Әпипә

Бас, кызым, әпипә,
Син басмасаң, мин басам.
Синең баскан эзләреңә
Мин дә китереп басам.

Бас, кызым, әпипә,
Син басмасаң, мин басам.
әпипәнең калачларын
Ашап калыйм ичмасам.

Бас, кызым, әпипә,
Идәннәре селкенсен:
Идәннәре селкенсен дә
Кияү күңеле җилкенсен.

Бас, кызым, әпипә,
Сындыр идән тактасын.
Сындырсаң идән тактасын,
Кияү түләр акчасын

Сибелә чәчем

Сибелә чәчем, сибелә чәчем,
Сибелә чәчем, тарала.
Йә утка сал, йә суга сал,
Йә кайгымнан арала.

Уйсу җирнең агым суы
Ага икән таң белән.
Узар, ахры, яшь гомерем
Гел сагыш, гел моң белән.

Сандугачлар су эчәләр
Агыйделгә тезелеп.
Нигә болай сагынам икән,
Үзәкләрем өзелеп?!

Өнсә авылы көе

Безнең авыл өсләрендә
Йолдыз яна яктырак ла;
Айга да йолдыз бик якын,
Син генә миннән ерак.

Кыйблалардан искән җилдән
Бөгелә талның нечкәсе лә;
Йөрәгемнең саф җиреннән
Чыга сагыш чишмәсе.

Сызылып таңнар аткан чакта
Ямансу була язын ла;
Аерыласын алдан белдем —
Ялгыз күрдем кыр казын.

Исмәле, җил, туктәле, җил,
Өзмә гөлләр чәчәген лә;
Алга килми белеп булмый
Башның ни күрәчәген.

Ялгыз каен

Ялгыз каен булмый, диләр,
Ялгыз каен күлләрдә ләй;
Ялгыз каеннардан ялгыз
Мин бүгенге көннәрдә.

Ялгыз каен булмый, диләр,
Менә бер ялгыз каен ла;
Ялгыз каеннардан ялгыз
Иттең бит, җаныкаем.

Ялгыз каен булмый, диләр,
Була торгандыр инде лә;
Һәркемнең дә бер хәсрәте
Була торгандыр инде.

Наласа авылы көе

Өздереп гармун уйныйлар
Наласа авылында.
Йөрәгемә утлар яктың —
Янам мин ялкынында.

Бала чагым гөрләп үтте
Наласа кырларында.
Сагынуларым, сагышларым
Бу моңлы җырларымда.

Наласа голлэре елый
Саныйсы калган икэн.
Куз керфеклэрем талганчы,
Карыйсы калган икэн

Төнбоеклы тирән күлдә
Тезелеп йөзә аккошлар.
Үсеп җиткәч, чит җирләрдә
Йөртә безне язмышлар.

Озату

Урманнарга барган чакта
Адаштым юлларымны;
Күңелем йомшак, елармын, дип,
Бирмәдем кулларымны.

Сикердем читәннәрен лә,
Йөгердем, җитәлмәдем;
Ни булды икән телләремә —
Сау бул, дип әйтәлмәдем.

Өй артындагы талларны
Яратмасаң, кисәрсең;
Мин сагынсам, тәрәз ачам,
Син җил булып исәрсең.

Таң атканда

Таң-таң ата, чулпан калка,
Чулпан таңның көзгесе.
Чулпан таңнарның көзгесе,
Минем сагыну билгесе.

Сызылып кына таңнар аткан чакта
Су өсте матурлана.
Сине уйлап яшь йөрәгем
Су кебек дулкынлана.

Таң-таң ата, чулпан калка,
Чулпан таңны уята.
Чулпан таңнарны уята да,
Нигә сине уйлата.

Уяна таңы илемнең,
Кырларга китә нуры.
Таң булып безнең якларда
Балкысын гомер юлы.

Рәйхан

Аклы ситсы күлмәгеңнең
Якаларын кем уйган?
Әй, Рәйхан, исемең кемнәр куйган,
Сине күреп кем туйган?

Аклы ситсы күлмәгеңнең
Таба алмадым ишләрен;
Әй, гомерем буйларына, Рәйхан,
Оныта алмасам нишләрмен?!

Аргы яктан бирге якка
Басма салдым киң итеп;
Әй, гомерлек яр булсын, диеп,
Сине сөйдем тиң итеп.

Уел

Әрәмәгә керсәм, үлән сирәк,
Сахраларга чыксам, җир җиләк;
Эчемдә генә минем утлар яна,
Ник җилкенә икән бу йөрәк?

Ай-һай гына диеп бер кычкырсам,
Яңгырыйдыр кыя ташлары;
Табылмаган дөнья малы өчен
Каңгырыйдыр егет башлары.

Арыслан ла киек, ай, алдырмас,
Каршысында биек тау булса;
Егет тә генә кеше һич кайгырмас,
Газиз башы аның сау булса.

Дим - дим

Җилфер-җилфер, дим-дим,
Йөргән чакта, дим-дим,
Җилләр ача куенымны.
Янып-көеп, дим-дим,
Йөргән чакта, дим-дим,
Дуслар ача күңелемне.

Җилфер-җилфер, дим-дим,
Итүе лә, дим-дим,
Җилнең алып китүе.
Күңелле дус, дим-дим,
Ишләр белән, дим-дим,
Бергә гомер итүе.

Җилфер-җилфер, дим-дим,
Ука чуклар, дим-дим,
Ник җилферди, җил дә юк?
Синең кебек, дим-дим,
Матур ярлар, дим-дим,
Авылда түгел, илдә юк.

Кошларга

Һаваларда очкан кошкайларның 
Күңелле икән шаулап үтүе. 
Авыр икән, дуслар, сөйгән ярны озату, 
Тагы да авыр сагынып көтүе. 

Һаваларда очкан кошкайларым, 
Сәламнәрем җитсен иркәмә. 
Мәхәббәтем көчле — янган утлар төсле, 
Сүнмәс алар кичен-иртән дә. 

Һаваларда очкан кошкайларым, 
Аңлатыгыз сагынып көтүем; 
Аны уйлый-уйлый, күзем йокы алмый 
Йокысыз төннәрем үтүен.

Эскадрон

Батыр егет килә ат өстендә,
Аты уйный авызын тартканда.
Булат савыт кигән, сөңге тоткан,
Ташны яра уклар атканда.

Ак очкыннар оча ат авызыннан,
Ташлар сына аяк астында.
Алга чаба батыр, алга бара,
Чаң тузаны кала артында.

Ник ашыга батыр, ник ашкына,
Ни ишеткән батыр, ни күргән?!
Намусы бар егет нигә ятсын,
Ил читенә бүген яу килгән.

Арча

Арча якларына карыйм,
Дустым Арча ягында.
Арча ягы бигрәк матур
Кош сайраган чагында.

Арчаларга барсаң, бәгырем,
Ал гөлләрне өзәрсең.
Үзәгемне бик өзәсең,
Үзең ничек түзәсең?

Китәм, бәгырем, китәм, бәгырем,
Каласың Арчаларда.
Онытырлык ярым түгел,
Утларга салсалар да.

Арчаларга баруларым
Гөл-сирень өчен генә.
Януларым, көюләрем
Гел синең өчен генә.

Аллар үсә, гөлләр үсә

Сандугач сайрап су эчә
Кызыл гөл арасыннан;
Иртән торып, хатлар көтәм
Син дустым тарафыннан.

Аллар үсә, гөлләр үсә
Идел буе — тугайда.
Сагынмас кешеләр булмас,
Сагынсаң да түз, әйдә!

Алсу гөлем, алсу гөлем,
Алсу гөлләрем сиңа;
Алсу гөлем, саф күңелем
Бүләк итәм мин сиңа.

Аллар үсә, гөлләр үсә
Идел буе — тугайда.
Сагынмас кешеләр булмас,
Сагынсаң да түз, әйдә!

Ал Зәйнәбем

Бакчадагы гөлләремнең
Тамырлары бер генә шул, Зәйнәбем.

Ал Зәйнәбем, гөл Зәйнәбем,
Рәхәт үтсен җәйләрең.

Кайчан да бер күрешербез,
Белмим көннәрен генә шул, Зәйнәбем.

Ал Зәйнәбем, гөл Зәйнәбем,
Рәхәт үтсен җәйләрең.

Һавадагы йолдызларны
Нигәдер санамадым шул, Зәйнәбем.

Ал Зәйнәбем, гөл Зәйнәбем,
Рәхәт үтсен җәйләрең.

Күз тияр дип, йөзләреңә
Нигәдер карамадым шул, Зәйнәбем.

Ал Зәйнәбем, гөл Зәйнәбем,
Рәхәт үтсен җәйләрең.

Карачтау авылы көе

Агыйделнең парахуты
Җиталмый кызыл ярга шул;
Җиталмый, дуслар, җиталмый
Яратып сөйгән ярга.

Агыйделнең парахуты —
Бездән еракта уты шул;
Сине уйламый үтә микән
Сәгатьнең бер минуты?!

Агыйделнең парахуты
Җиталмый кызыл ярга шул;
Җиталмый, дуслар, җиталмый
Яратып сөйгән ярга.

Агыйдел сулары булсам,
Уралып агар идем шул;
Яңгыр тамчылары булсам,
Алдыңа тамар идем.

Рамай

Төнгә каршы берәү моңлы итеп, Рамай,
Аерылышу көен җырлады.
Тынга калды урман буйлары ла, Рамай,
Чишмәләр дә акмый тыңлады.

Китәм инде, иркәм, мин еракка, Рамай,
Сөйгән ярым, синнән аерылып.
Мине сагынганда бер карарсың, Рамай,
Киткән юлларыма каерылып.

Йөрәк ярсуыңны баса алмыйча, Рамай,
Тыңларсыңмы, җырлар ла җырлармын.
Күзләреңне тутырып карарсыңмы, Рамай,
Зәңгәр таудан яулык ла болгармын.

Кашыңның каралары.

Кашыңның каралары ла,
Карлыган каралары.
Без үзебез аерылмадык,
Без үзебез аерылмадык —
Табигать аралады.

Утырып пар атларга ла,
Киттең кай тарафларга?
Сагышларымнан нишләрмен,
Сагышларымнан нишләрмен —
Килми сәлам хатлар да.

Күзләреңне, күзләреңне,
Күзләреңне күзләдем.
Күзләреңнән серең алдым,
Күзләреңнән серең алдым —
Син бит шуны сизмәдең?!

Башымны салдым салларга,
Чайкалдым елгаларга.
Аерылгач җиңел түгел,
Аерылгач җиңел түгел
Яшәргә дөньяларда.